नेपालगन्ज । त्रिभुवन विश्वविद्यालयको क्षेत्रिय परीक्षा नियन्त्रण कार्यालय नेपालगन्जमा आज ताला लागेको छ ।
स्नातक तह चौंथो वर्षको परीक्षा सञ्चालन हुनुभन्दा ३ दिन अगाडी मात्र अचानक परीक्षा केन्द्रहरु परिवर्तन गरेको भन्दै विभिन्न क्याम्पसका विद्यार्थीहरुले आज नेपालगन्ज स्थीत त्रिभुवन विश्वविद्यालयको क्षेत्रिय परीक्षा नियन्त्रण कार्यालयमा तालाबन्दी गरेका छन् ।

यहि चैत्र १२ गतेबाट शुरु हुने स्नातक तह चौंथो वर्षको परीक्षाका लागि परीक्षा नियन्त्रण कार्यालयले चैत्र ९ गते मात्रै आफ्नो फेसबुक पेज मार्फत साविकको मध्यपश्चिमाञ्चल क्षेत्रभित्रका सबै प्राय क्याम्पसहरुको परीक्षा केन्द्र परिवर्तन भएको कुनै आधिकारिक हस्ताक्षर, छाप तथा लेटरप्याड विनाको सूचना प्रकाशित गरेको थियो

पूर्व सूचना विनानै परीक्षाको मुखैमा आएर विद्यार्थीहरुलाई दुःख दिनकै लागि परीक्षा केन्द्र परिवर्तन गरेको भन्दै बाँके र बर्दियाका विभिन्न क्याम्पसका विद्यार्थीहरुले साबिककै परीक्षा केन्द्रहरुबाट चौंथो वर्षको परीक्षा सञ्चालन गर्ने ब्यवस्था मिलाउनका लागि दबाब स्वरुप तालाबन्दी गरेको बताएका छन् ।

परीक्षा नियन्त्रण कार्यालयको उक्त निर्णयका विरुद्ध नेपाल पब्लिक क्याम्पस संघ बर्दिया, पब्लिक क्याम्पस संघ, कर्णाली प्रदेश समिति तथा बाँके र बर्दियाका सामुदायिक क्याम्पसका क्याम्पस प्रमुखहरुको सञ्जालले पनि आज एक अलग अलग विज्ञप्ती परीक्षा नियन्त्रण कार्यालयमा बुझाएका छन् ।

प्राप्त जानकारीका अनुसार आज नै त्रिभुवन विश्व विद्यालय केन्द्रिय परीक्षा नियन्त्रण कार्यालय, बल्खु र सुदुरपश्चिम परीक्षा नियन्त्रण कार्यालय, अत्तरीयामा पनि तालाबन्दि भएको छ भने विभिन्न ठाउँहरुमा त्यस निर्णयको विरुद्ध आन्दोलन भएको खबर प्राप्त भएको छ ।